علشان نعرف نعيش.. لازم عدّة وشوش
و الوش الأصلي غايب لو فين متلقهوش
و عشان نعيش حياتنا هنكون حبّة وحوش
لو حضرت الفريسة اوعاك رزقك تحوش
لكن قبل امّا تسلخ هتجهز ليها حوش
و تجهّز ف المراسم و تفصّل ف النعوش
و انْ صرخت الفريسه بصريخ متفهموش
اديها ضربه قاضيه ليروح تعبك فشوش
مهما تصرّخ تفلفص.. اديله مترحموش
و الميّا تبقى سخنه لاجل فريستك تبوش
متقولش حرام عليكم.. متقولش محبهوش
و انْ كانت فرصه تيجي حظّك متفوتوش
و هتاكل وجبه حلوه و تكبّر في الكروش
كده تعتلي في المراتب و هتوصل للعروش
آه يا شويّة حثاله.. للظلم مبيتسيبوش…
#شعر_ابن_عوض
Oriental 207 