مش هرجعلك..

مهما هايحصل مش هرجعلك

قلبي هيقسى و تبقي سراب

مهما تحاولي لا يمكن هانسى

قلبك باعني كما الأغراب

مع انّي ف هواكي اديتلك

كلّ اللي بيدّيه الأصحاب

كنت أبوكي و اخوكي و ابنك

و حبيب فوق كلّ الأحباب

لمّا تخافي تلاقي أمانك

و عدوّك باكله بأنياب

كل الحب اديته بقلبي

قلبك شافه كأنّه تراب

طب ليه قلت أنا كلمة “قلبك”

قلبك ده مليان بخراب

لما الحبل أنا كنت بشدّه

كفّك فَلَته و رخّى و ساب

و لا نافع في حكايتك عِشره

و لا عيش نافع و لا أنساب

و مينفعش معاكي شعوري

و لا كلمة و لا حتّى عتاب

تايب من أحلامي معاكي

و قفلتيني.. قفلت الباب…

#كلمات_محمد_عوض

#شعر_ابن_عوض