“توبهيرهو أدواء المادينا”

طبعا و بمنتهى الهدوء..

موضوع ان واحده تصور نفسها بترقص بالمايوه البكيني و تنزل ده على التيك توك مش مقصود بيه اي نوع من التفسُّخ و لا الخروج عن المألوف و لكن البكيني ده لبس بحر و هي ما تقصدش حاجه بالرقص غير التّعبير عن السّعادة..

طيب لبستي بكيني و قلتي لبس بحر، بترقصي بيه ليه و تنزلي الفيدية على تيك توك.. بحاول ادور معاكي على الأهداف الشريفة للموضوع ده.. ده بخلاف ان كلمات الأغاني اللي حاطاها في الخلفية لا تدلّ على أي نوع من أنواع العفاف..

و لو أي حدّ انتقد لأيّ سبب “الوضع” ده يبقى بيحجر على المشاعر رجعي تخلّفي تأخيري تقديمي متفيقه زنديق خسيس… و “موناهيض لحكوك البيكيني موناصير لحكوك البوركيني و بيئا فارمر توبهيرهو ادواء المادينا”

كل ده مش مزعلني قدّ ان تكون لسه لابسه البكيني قدامك و بترقص و اول ما تروحلهم الشاليه زيارة و تكون لابسه شورت تطلع تجري عشان ميصحش و تلبس بنطلون.. آه عشان مينفعش تقعد كده قدام حد غريب!

لولا ضوابط الكتابة و النّشر لكنت لأوّل مرّة في التّاريخ هكتب كلمة تدخل المجمع اللغوي من تأليفي، و هي صياغة الأصوات الأنفيّة الهوائية الانسحابيّة في صورة حروف معظمها “خ”.