مش لازم كل الرزق فلوس


موسيقى الخلفيّة (207)

مش لازم كل الرّزق فلوس
دا الرّزق ألوف لو مش محسوس
ف صورة بسمَه تبان على وشّك
ممكن في كلمة تهدّي نفوس

لو ف همومك غارق مغروس
مش حاسس بالرّزق الملموس
لما يجيلك رزقك اشكر
لا خيار فارق و لا فقّوس

و إن كنت مريض او يوم تعبان
م الدوا مهري حقن  و لبوس
يمكن رزقك انك تصبر
على هَمّ و حِمْل و فيروس

ممكن رزقك ييجي ف نومك
تحلم بنعيم و تلافي كابوس
اوعاك إن كان حالَكْ ضيّق
أو قلّ القرش تعيش متعوس

لو يوم عينك شافت أعيان
و لو ناس ماشية بزيّ طاووس
اوعى تقارن نفسك بيهم
دا قارون مات هالك منكوس

ربّك بيوزّع كل نصيب
ع الخلق بعدله بيدّي دروس
رزقك جايلك مهما تحاول
يكفيك السّعى و شَدّ القوس

و الرّزق  يجيلك بيهرول
لو تسعى و لو شَكِّة دبوس
ربّي ابسط لي الرزق و بارك
سبحانك رزَّاقنا و قُدُوس

في واحد ماشي يحوم بالشكوى
ماشي بيتذمّر و يحوس
قارف ناسه بكتر مصايبه
فاكر نفسه تعيس منحوس

عايش عيشته جوّه وساوس
و الوسواس بيهدّ نفوس
اهدى و اخرس.. بطَّل شكوى
هتلاقي الرّزق كما الأبانوس

في ناس لما تتاجر تحلف
عند يمينه بيبقى “غَموس”
قاعد يحلفلك يتحلّف
و ياخدلك مكسب فسفوس
متخافش على يمينك راح تكسب
ف جبال اوزار و تعيش منكوس

غيرك قانع لو كان مهروس
قاعد يرعى ف ألف جاموس
ظهر انحنى من طول الكَدّ
شايل قفاطين و زِلَع و فؤوس
لما بيكسب اتفه مبلغ
حامد ربّه و كفّه يبوس
قادر ربّك يوهبله الصّحة
جسمه بيبقى مكن و تروس

واحد قاعد يحسد جاره
قاعد باصص زي جاسوس
فاكر ان مشايله و خيره
يتعبّى في زكايب متروس
يصبح جاره ميت منه
بيعيش محسود و يموت منفوس

و المُبتَلى بالظُلْم و ساكِت
صابر مقهور بينام مكبوس
و بيدعي لربّه اللي يحوّل
يوسُف لعزيز لو كان محبوس

واحد تاني ضايع مهووس
فاكر نفسه قال ايه ملبوس
قال الجنّ واقفلي ف رزقي
ربّنا حافظ و انت المحروس

في ناس بتقول نفسها تتجوز
قمرات م البيض و الحور و الرُّوس
يابني هتفهم لما هتكبر
ان جمالها بياكلو السّوس
لو بجمالها الواحده بتبقى
شبه القمرات تقلب عرنوس

و لا التّاني.. مقدرش يكمّل
قام قطّع شرايينه بالموس
و دا م الدنيا هيهرب لكن
هيقف كافر في “يَوْم عبوس”

لما ف يوم رزقك يتأجِّل
اوعى تكَشًّر  تبقى يؤوس
سبحانه تعالى كافينا بستره
بالصّحّة بتمشي و  بتدوس
حتّى الصَّحة إن قلّت منّك
ربّنا بيعوّض أي جلوس

موضوع الرّزق دا حقّ لربّك
مالهوش كتالوج ولّا قاموس
و إن كان ربك حايش رزقك
لا هينفع ترانيم و لّا طقوس

و انت يا صاحبي و انت بتحسب
أو قاعد  بتعدّ و مهووس
عايزك تعرف و انت بتحسب
مش لازم كلّ الرّزق فلوس!

شعر ابن عوض

#كلمات_محمد_عوض

One comment

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s