صرخة منفسن °٢


الموسيقى الهزلية

انا هعلمك تبطل تفتح المقالات دي لما تلاقي عنوان “منفسن”..

ده مش مكان للقراء العاديين؛ ده مكان ناس منفسنين و جايين يونسوا بعض و يفضفضوا بحرّية من غير نظرات الذهول المعتاده..

بيفهموا بعض؛ و مقالاتهم عامله زي جنازة بيشبعوا فيها لطم، و الكلام مش من وحي الخيال.. ده من وحل الخيال.. و لا نُدلي بدلونا.. انما نجردل بجردلنا.. فضفضة بقى..

عشان تفهم الكلام ده هسألك سؤال و تجاوبني بدون فلسفة.. نفسي افهم ايه فايدة انك تكتب اسمك و اسم من تُحب على حباية رز؟! ها؟!! شفت بقى منقوطين احنا ازاي! يعني مثلاً الرز ده دليل على انهم هيعيشوا عيشة رغده و يخلفوا صبيان و حماده؟ و لا ده دليل على النَّماء و الماء ماء..

شفت انّك مش بسهولة هتفهمني.. دي كانت محتاجه واحد منفسن الأحماض بتدلدق من ودانه.. هيشوف في موضوع زي ده فسحة و ترويح.. بس هاعمل ايه.. انت اللي جيت قدامي..

بلاش.. مُعْتَزّ.. عارفه؟ الشاب المحترم جارنا؛ الراجل محدش يقدر يعيبه؛ بس عندي استفسار بسيط، هو مُعتز ده مين اللي “عَزُّه”.. اييي أقصد مين اللي بيعزه.. صدقني ده مش سؤال وجودي؛ أكيد أول واحد اخترع الاسم كان يقصد حاجه او في حد مذكور في التاريخ أنه عزُّه.. لو واحد منفسن مكانش بص كده..

ده مش تضييع وقت.. صدقني..

طيب لو عايز تشغَّل دماغك اقولك أنا.. ليه لما تروح تشتري ساندويتش فول بتلاقي الراجل المحترم اللي بيعمل الساندويتش بيتحرك ألف حركة و يبذل ألف كالوري عشان يحط معلقة فول جوه نص رغيف، الموضوع ده متلاقيش حل ليه، على فكره الموضوع محتاج خطوتين بس؛ افتح العيش ثم حط الفول.. شكراً.. ايه كمية الفرهدة اللي بيرتكبها ف نفسه دي! شئ عجيب و الله..

انت فاكر هتمشي.. لا.. بس عايز أسألك أهم سؤال فيهم لو عرفت تجاوبه تبقى جبرت.. هو ليه دخول الحمّام مش زي طلوعه؟ مع ان دخوله زي طلوعه مفيش حزق.. قصدي مافيش فرق..

انا أصلاً غلطان أصلاً اني دخلتك مجلس وقور زي ده..

غور.

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s