بدون حساسيّة..

حلو قوي قصة ان البنات بتلعب Kick Boxing و بتروح ال Gym و تمارين سمكرة و تنفيخ و خلافه..

واحد يقولي و انت مالَكْ.. أقوله و انتَ مالَك!

المهم..

يعجبني التفاخر بأنهم بيشيلو اوزان و بيربوا عضلات وباي و تراي و هاي..

و بيلبسوا حمالات و شورت في التمرين عشان لو لبست “منطلون” التمرين يبوظ؛ و في رواية “يبوز”..

و لازم “تبعان” (طبعاً؛ بس الطاء بيئه و حرف النون بدل التنوين عشان الفرهده) يكون الجيم مُخْتَلَط عشان نثبت للناس كلّها قد ايه احنا ناس “متفتحه” 🤔 و ليبراال.. و ان الولاد حواليهم في كل حته شايفين التمارين و الحمالات و الشورت و قد ايه منضبطين..

باختصار؛ أنا شايف ان كده في مشكلة في الولاد و البنات..

و عادي؛ يعني لو لبست بيكيني على البحر قدامي عادي؛ و لو زرتهم في البيت و هي لابسه شورت تطلع تجري!

طول عمري بحاول افهم المنطق بتاع الرجاله دي؛ و نفسي في مرّة يروح معايا مركز أشعة؛ حاسس انه هيطلع عنده “قناصه” بصفته ديك رومي و في رواية “ديك أمّه”..

واحد يقولي دي افكار رجعيّة تأخريّة ديماجوجيّة مهلبية.. اقوله بصوت ام كلثوم “حبيبي تعالى’.. تعالى’ تعااالى’..”

تقولك “ماحنا طول عمرنا بنيتماران مع كابتين علي و هوبا يمين و هوبا شمال و شحط محط فوق و تحت و الراجل بسراحه عمره ما بص بصه غلط” أقولها مطلوب الكابتن يجيلي في العيادة من ٦-٩ عشان اطمن عليه..

كفايه تنطيط و اشربوا م المحيط..