كهوة..


مش فاهم ايه موضوع النفسية محتاجه…
و ده احلى …. و لا ايه
و إيه علاقة البقدونس بالنفسية و ليه مش الشبت؟!
و شجرة شبابي طرحت كلابي و الهري ده..

قالك نحن بحاجه لفنجان “كهوه” مع الست فيروز و قلبت تريند، “ذات مومنت” كنت غضبان و شربت فنجان كهوه و سمعت الست فيروز و محصلش أي حاجه عادي (مع احترامي للقهوة و للست فيروز).

و بالنسبة لقصة تداخل البقدونس في المشاعر الموضوع ده عقلي المحدود مش عارف يستوعبه هل في علاقة تربط الحصين بالخضروات؟ 🤔 هل دي من دلالات العبقرية و ربط الأشياء و الأضداد ببعض؟

هو مين اللي قال ان الشباب شجره؟ انا شخصياً شايفه دولاب مش شجره، و دولاب حياتي يا عين ما شفت زيه دولاااب.

بتجاملها بشدة، قالتلها ده احلى نيو لوك ده بقى و لا إيه و راحت خابطه “صمايلي فايص 🙂”. بسم الله الرحمن الرحيم الإجابة هي لأ.

و مش عيب واحده تدلع صاحبتها تقولها “انتي كلبوبة” مع “صمايلي فايص” خدوده محمره؟ ليه مش “انتي نسنوسه” فصاحبتها هنا تزعل منها؟ على أساس إن النسناس أدنى من الكلب؟!!

أما عن الشخص العميق السيريالي الدييب، فيحط صورة وراها Chroma و يركب صورة حصان مجنح و يلبس طاقية و يعوجها بزاوية ٤٥ و يكتب كلام سطحي عميق على وزن، رحيل أو يكفيني شموخ اللقطه أو كفاني بنفسي صديقاَ… إلخّ.. و تلاقي أباطرة الهلس ينهالوا بتعليقات مالهاش أدنى علاقة بالصورة و لا التعليق، تلاقي حد بيعيط و التاني كاتبله “كلام منمّق و ف الصميم” و دواليك من تعليقات تليق اكتر على توك توك أو عربية كبدة.

و ختاماً مقدرش أنسى الساخطين القانعين، كل حاجه بينطقوها سخط و كل حاجه بيكتبوها قناعة، طول النهار نقد و سخط على العيشة و اللي عايشينها بس ساعة “الفيس” (الفيس بوك) تلاقي عشرات التعبيرات القنوعة على شاكلة المدير او الزوج او الصديق “الفرفوش” “رزق” أو الرفيق البهلول رزق او النسيب المحروق رزق المهم أي حاجه مالهاش أي لازمة على وزن “الفعيل الفعلول فِعْل” تلاقي كمية ال”صمايلي فايصيس” لا تُحصى.

ناس كتير شافت ان الكلام اللي فات ده دمه تقيل و سئيل و احب أقولهم “ميهمنيش”.

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s