… عوضيات …


كل شئ أصبح مخيف .. حتى شكّي ف الرغيف
و القوي بياكل الضعيف .. و الوقح دبح الشريف

كل شئ اصبح سراب .. ماحنا عايشين ف الضباب
و الخداع ليه ألف باب .. و العجوز غلب الشباب !

كل شئ أصبح كئيب .. و العدو بدل الحبيب
و المريض عالج الطبيب .. و الصبي بلغ المشيب !

كل شئ أصبح بليد .. و أسمو بيفوت ف الحديد
و الضعيف شبه الشديد .. و النفاق أصبح مفيد !

كل شئ اصبح كلام .. أي تثبيت و السلام
و المرعوش أصبح همام .. و الزنديق أصبح إمام !!

كل شئ أصبح هلام .. و الراجل شبه المدام
و الشيوخ سبقو الإمام .. و الحقيقة ف المنام !

كل شئ أصبح مرار .. و البرئ له تار و عار
و البروده فيها نار .. و الشجاعه ف الفرار !

كل شئ أصبح هزار .. جوه ديسكو جوه بار
ناس ف جنه و ناس ف نار .. و الشياكه ف الانتحار !!

كل شئ بالانجليزي .. حتى نومنا يا عزيزي
زي لبنى و زي زيزي .. ضحكهم بالانجليزي !!!

كل شئ بالامريكاني .. و البُكى و حتى الأغاني
منهم بتوه المعاني .. و اللي يفهمها يعاني …

كل شئ أصبح ” ستايل ” .. لبسنا و حتة ” موبايل ”
صوره سافله جوه ” فايل ” .. أو بيكيني ف شط ” نايل ”

المدير لابس ” فانله ” .. و البدل ” أسلن ” ممله
الاجتماع بقى هاي يا شله .. و الشناكيت أكبر أدله

توتو عامل ” بوني تيل ” .. لو كشفتو تلاقي ديل
لو لمستو مافيهش حيل .. لو عيط هـتلاقي سيل

نونو عامل فورمه فانكي .. و بيفطر ” كيت كات و شانكي ”
أسمو ع الفيس بوك ” ذا منكي ” .. اسمو كامل ” فانكي مانكي ”

هيص و خش ف أحلى عيشه .. دوس ف بيره دوس ف شيشه
لف بانجو أو حشيشه .. عاكس واحده لابسه بيشه !!

انت عارف أنا أبقى مين ؟ و لا خالتي تبقى مين ؟
و لا طنط ميكي مين ؟ و لا سالك انهي دين ؟!!

كل شئ عندو ” فشيخ ” .. أي اراجوز ف التاريخ
أو دي رنجه أو فسيخ .. أو دي كفته جوه سيخ
يع يع على ” التبيخ ”

كل شئ ف حياتو كاب .. شئ مغطي ع الهباب
أو مسرّح باللعاب .. أو جيل بدهن الكباب

كل شئ ف حياتو جينز .. أصلو راكب حته بنز
واد لذيذ يعرف يهز .. غور يا ابن المستفز ..

كل شئ أصبح وسايط .. الاتكال بقى ع الوسايط
و الهلفوت مبسوط و زايط .. و المسكين مقهور و شايط !

كل شئ يسهل برشوه .. ألف ميه جوه حشوه
أو كام سفريه و عشوه .. بيها توصل أحلى نشوه …

كل شئ لو يبقى مادي .. هاتعيش عيشه لونها وردي
و لمشكلتك حل عندي .. خد من عندي ألف جندي …

كل بلطجي ف المدينة .. ماشي يتسنكح علينا
ياخد كل اللي ف ايدينا .. و السياسه جنت علينا …

كل شئ ضل الطريق .. و الطريق عمّال يضيق
و الطريق مافيهوش رفيق .. م الشياطين كمل الفريق

كل شئ أصبح خداع .. و الصديق راح خان و باع
و شيخ طريقة الابتداع .. قضّى عمره ف المتاع

كلو صاحب ف المصالح .. ف الخصام تلاقيه يصالح
ف الخداع و الغش فالح .. كلو لعيون المصالح ..

كل شخص و له مطامع .. و ف فلوسك بس طامع
أوعى تلقاه مرّه طالع .. و تناديلو بحسن طابع ..

كل شئ أصبح خيال .. تاه ف ضلو ألف بال
و الواقع أصبح وبال .. يحدفك أسوأ مآل …

كل شئ أصبح مؤامره .. و الفاتح ليه بشره سمره
البيضه سيبها لونها حمره .. و العصير و الله خمره !

كل شئ بالهرمونات .. حتى عيشنا و الفتات
داحنا عايزين معجزات .. حتى لو ناكل رفات !!

ميه بشرب و لا جاز ؟ و الهوا مشبع بغاز
و الكون بيعاني احتباس .. و اللي يهرب يبقى فاز !!

كل شئ من جوه فاضي .. حتى ذمة ألف قاضي
و المزور شخص عادي .. و الظلام أصبح رمادي !!!!

كل شئ فقد الصراحة .. و الخروج م الدنيا راحه
مفتي راح مدي الإباحه .. بالزنا و ف أحلى ساحه !!

كل حي و كل حته .. البرئ ييجي بس سته
و الباقيين من جوه عته .. م الحرام كلو طشت فته

كلو رايح جوا جيبو .. لو نهب و بيجري سيبو
م الحرام أخد نصيبو .. و ماحدش يقدر يعيبو !!!

ثانيه واحده تبقى ساعه .. حتى ف قناة الإذاعة
و لا كشك و لا باعه .. و الألوان برا الطباعه !!!

كل شئ بقى لونه باهت .. و المعاني الحلوه تاهت
و الوجوه الصادقه شاحت .. و الجواهر عمله ساحت …

كل شئ ف الدنيا فاني .. حتى خطّي و المعاني
مني ليك أجمل تهاني .. لما ف حياتك تعاني

دي البدايه و دي النهايه .. كل قصه و ليها غايه
و احكيلك مليون حكايه .. بس لو تفضل معايا …

رباعيات ابن عوض

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s